Naxçıvan Muxtar Respublikası Səhiyyə Nazirliyinin təşkilatçılığı ilə “Culfa Regional Tibb Mərkəzi” PHŞ-nin ixtisaslı həkim briqadası tərəfindən Culfa rayonunun Teyvaz Kənd Tibb Məntəqəsində tibbi müayinə aksiyası keçirilib.

Aztibb.az-a Naxçıvan MR Səhiyyə Nazirliyindən bildirilib ki, tibbi aksiya çərçivəsində ümumilikdə 46 nəfər müxtəlif ixtisaslar üzrə müayinədən keçirilib. Belə ki, 11 nəfər terapevt, 6 nəfər ginekoloq, 1 nəfər pediatr, 11 nəfər kardioloq, 6 nəfər nevroloq müayinəsindən keçib, 11 nəfərə isə USM müayinəsi aparılıb.

Müayinələr zamanı vətəndaşların sağlamlıq vəziyyəti qiymətləndirilib, aşkar olunan problemlərlə bağlı müvafiq tibbi tövsiyələr verilib və əlavə müayinəyə ehtiyacı olan şəxslər ixtisaslaşmış tibb müəssisələrinə yönləndirilib.

Əhalinin sağlamlığının qorunması, xəstəliklərin erkən aşkarlanması və profilaktik tədbirlərin gücləndirilməsi məqsədilə təşkil olunan bu cür tibbi aksiyalar sakinlər tərəfindən məmnunluqla qarşılanır və dövlətin vətəndaşların sağlamlığının qorunmasına göstərdiyi diqqət və qayğının bariz nümunəsi kimi qiymətləndirilir.