Bir çox qadın onkomarker analizini eşidəndə bunun xərçəng diaqnozu qoyduğunu düşünür. Əslində isə bu, doğru deyil.

Aztibb.az-ın məlumatına görə, ginekoloji onkomarkerlər qanda müəyyən maddələrin səviyyəsini ölçən laborator analizlərdir. Onlar həkimə bəzi xəstəliklər barədə əlavə məlumat verir və lazım gəldikdə diaqnozun dəqiqləşdirilməsinə kömək edir.

Onkomarker analizləri nə üçün aparılır?

Yumurtalıq, uşaqlıq və digər ginekoloji xəstəliklərdən şübhələnildikdə
Müalicənin effektivliyini izləmək üçün
Müalicədən sonra xəstənin nəzarətdə saxlanılması məqsədilə
Digər müayinə üsulları ilə birlikdə diaqnostikaya dəstək vermək üçün.

Onkomarkerin yüksək olması hər zaman xərçəng demək deyil.

Bəzi xoşxassəli ginekoloji xəstəliklər, iltihabi proseslər, endometrioz, hamiləlik və hətta bəzi fizioloji hallar da onkomarker göstəricilərinin yüksəlməsinə səbəb ola bilər.

Eyni zamanda, bəzi hallarda onkoloji xəstəlik olsa belə, onkomarker göstəriciləri normal ola bilər. Buna görə də bu analizlər təkbaşına diaqnoz qoymaq üçün istifadə edilmir.

Dəqiq diaqnoz necə qoyulur?

Onkomarker analizinin nəticələri mütləq həkim tərəfindən:
pasiyentin şikayətləri,
 ginekoloji müayinə,
ultrasəs müayinəsi,
ehtiyac olduqda digər görüntüləmə və laborator analizlərlə birlikdə qiymətləndirilməlidir.

Onkomarker analizləri qorxmaq üçün deyil, düzgün diaqnoz qoymağa kömək edən vasitələrdən biridir. Analizin nəticəsini yalnız mütəxəssis düzgün şərh edə bilər.