Beyləqan RMX-nın Dünyamalılar Ailə Sağlamlıq Mərkəzinin tibb işçiləri tərəfindən əhali arasında mütəmadi olaraq ev ziyarətləri həyata keçirilir.

 

Xəstəxanadan Aztibb.az-a verilən məlumata görə, ev ziyarətlərinin əsas məqsədi tibbi xidmətə ehtiyacı olan və müxtəlif səbəblərdən tibb müəssisəsinə müraciət etməkdə çətinlik çəkən şəxslərin sağlamlıq vəziyyətinin yerində qiymətləndirilməsi və onlara vaxtında tibbi dəstəyin göstərilməsidir.

 

Ziyarətlər zamanı vətəndaşların ümumi sağlamlıq göstəriciləri nəzarətdə saxlanılır, zəruri hallarda ilkin tibbi yardım göstərilir, müalicə və qulluq prosesinə dair tövsiyələr verilir. Eyni zamanda pasiyentlər və ailə üzvləri sağlam həyat tərzi, xəstəliklərin profilaktikası və mütəmadi tibbi nəzarətin əhəmiyyəti barədə maarifləndirilirlər.

 

Xüsusilə yaşlı, hərəkət məhdudiyyəti olan və davamlı tibbi müşahidəyə ehtiyacı olan şəxslərə göstərilən bu xidmət onların sağlamlığının qorunmasına və həyat keyfiyyətinin yüksəldilməsinə mühüm töhfə verir.