Dünya okeanının səth temperaturu növbəti rekord göstəriciyə çatıb. Hazırkı göstəricilər 2023 və 2024-cü illərin eyni dövründə qeydə alınan anomal temperatur səviyyələrini artıq geridə qoyub.

Aztibb.az "The Guardian" qəzetinin məlumatına istinadən yazır ki, Avropanın Copernicus İqlim Dəyişikliyi Xidmətinin rəsmi açıqlamasına görə, qütb bölgələri istisna olmaqla Dünya okeanının səth temperaturu ilin bu dövrü üçün tarixi maksimumu ötüb. Klimatoloqlar xəbərdarlıq edirlər ki, bu vəziyyət hava şəraitinə, qlobal iqlimə və dəniz ekosistemlərinin vəziyyətinə ciddi mənfi təsir göstərə bilər. Əlavə narahatlıq doğuran məqamlardan biri də El-Ninyo iqlim hadisəsinin son onilliklərin ən güclülərindən birinə çevrilə biləcəyi ilə bağlı proqnozlardır.

Bundan əvvəlki rekord 2023-cü ilin iyununda qeydə alınmışdı. Həmin dövrdən sonra dünyanın müxtəlif bölgələrində ekstremal istilər, daşqınlar və güclü fırtınalar müşahidə olunmuşdu. İndi isə həmin rekord da geridə qalıb.

Alimlərin sözlərinə görə, Dünya okeanları Yerin iqlim sistemində yaranan artıq istiliyin 90 faizdən çoxunu özünə hopdurur. Bu istiliyin əsas mənbəyi isə fosil yanacaqların istifadəsidir. Ən narahatedici məqam ondan ibarətdir ki, okeanların isinmə sürəti getdikcə artır.

Bununla belə, mütəxəssislər yekun nəticələr çıxarmağa tələsməməyi tövsiyə edirlər. Çünki okean səthində ən yüksək temperatur göstəriciləri adətən iyul və avqust aylarında qeydə alınır.