Tanınmış klinik psixoloq Darya Salnikova bildirib ki, Skandinaviya yerişi təkcə fiziki sağlamlıq üçün deyil, həm də psixi sağlamlığın qorunması baxımından mühüm əhəmiyyət daşıyır.
Aztibb.az "İzvestiya" nəşrinə istinadən yazır ki, həkim Skandinaviya yerişinin və ümumilikdə müntəzəm fiziki aktivliyin əsas faydasının yalnız əzələləri möhkəmləndirməsi ilə məhdudlaşmadığını bildirib. Bu fəaliyyət beyin və hormonal sistemin fəaliyyətinə də müsbət təsir göstərir.
Psixoloqun sözlərinə görə, fiziki yüklənmə əzələlərin fəaliyyətini və qan dövranını aktivləşdirir, hormonal sistem isə psixi sağlamlığın əsas dayağı hesab olunur. O vurğulayıb ki, insanlar əksər hallarda pis əhval-ruhiyyəni düşüncələri ilə əlaqələndirsələr də, bunun səbəbi çox vaxt orqanizmdə baş verən biokimyəvi proseslər olur.
Darya Salnikova izah edib ki, oturaq həyat tərzi və smartfonlardan uzun müddət istifadə motivasiya və həzz hormonu olan dopaminin səviyyəsinin azalmasına, eyni zamanda stress hormonu kortizolun səviyyəsinin yüksəlməsinə səbəb olur. Onun sözlərinə görə, orta intensivlikdə, lakin müntəzəm fiziki aktivlik hormonal tarazlığın bərpasına kömək edir. Skandinaviya yerişi isə açıq havada aerob yükü qolların aktiv işi ilə birləşdirərək qan dövranını yaxşılaşdırır, endorfin və serotonin hormonlarının ifrazını stimullaşdırır.
Mütəxəssis xüsusilə məşqlərin müntəzəmliyinin vacibliyini vurğulayıb. O qeyd edib ki, həftədə bir dəfə məşq etmək müntəzəm fiziki aktivlik hesab edilə bilməz. Halbuki həftədə üç dəfə məşq etmək artıq nəzərəçarpacaq nəticələr verir. Salnikovanın fikrincə, idman həm fiziki, həm də psixi sağlamlığa müsbət təsir göstərir. Skandinaviya yerişi ani rahatlıq yaradan vasitə deyil, uzunmüddətli və yığılan təsir göstərərək orqanizmi dopamin səviyyəsinin kəskin enişlərindən qorumağa kömək edir.
Xatırladaq ki, may ayında fizioterapevt Pavel Meqey adi gəzinti əvəzinə Skandinaviya yerişi ilə məşğul olmağı tövsiyə etmişdi. Onun sözlərinə görə, adi yeriş zamanı əsas yük ayaq əzələlərinə və qismən gövdəyə düşdüyü halda, Skandinaviya yerişi çiyin qurşağını və belin dərin əzələlərini də aktiv şəkildə işə cəlb edir. Bu isə fiziki yükün bədən üzrə daha bərabər paylanmasını təmin edir.
