ABŞ-li psixoloqların araşdırmasına görə, yuxu pozğunluğu, kədər hissi və diqqətin cəmlənməsində çətinlik depressiyanın digər əlamətlərini tetikləyən əsas simptomlar hesab olunur.

Aztibb.az "British Journal of Psychology" jurnalında dərc olunan məqləyə istinadən yazır ki, tədqiqatda orta yaşı 19 olan 363 tələbə iştirak edib. Onlar 28 gün ərzində hər səhər əvvəlki gün yaşadıqları depressiya əlamətlərini qiymətləndiriblər. Təhlil göstərib ki, bir gündə yuxu problemləri, güclü kədər və ya diqqət pozğunluğu müşahidə edildikdə, növbəti gün bir neçə digər depressiya simptomunun yaranma ehtimalı artır.

Araşdırmaya əsasən, ən çox rast gəlinən əlamətlər kədər, yorğunluq və anhedoniya olub. Anhedoniya əvvəllər zövq verən fəaliyyətlərdən artıq həzz ala bilməmək vəziyyətidir.

Tədqiqatçılar həmçinin müəyyən ediblər ki, anhedoniya və narahatlıq səviyyəsi yüksək olan şəxslərdə depressiya əlamətləri daha geniş spektrdə müşahidə olunur. Alimlərin fikrincə, məhz bu simptomların erkən mərhələdə hədəflənməsi müalicənin effektivliyini artırmağa kömək edə bilər.