Bakıda Azərbaycan Respublikası Səhiyyə Nazirliyinin və İctimai Səhiyyə və İslahatlar Mərkəzinin dəstəyi, “OMP Akademiya”nın təşkilatçılığı ilə Asiya üzrə Beyin və Neyroelm Konqresi baş tutub.

Aztibb.az xəbər verir ki, beynəlxalq tədbirdə London Universitet Kolleci, Hacettepe Universiteti Tibb Fakültəsi, Mərmərə Universiteti Tibb Fakültəsi, Erciyes Universiteti, “Medicana” xəstəxanası, Asfendiyarov adına Qazaxıstan Milli Tibb Universiteti, Özbəkistan Dövlət Tibb Universiteti, Qırğızıstan Dövlət Tibb Akademiyası və Qırğızıstan Tibb Universitetini təmsil edən tanınmış akademiklər və ekspertlər iştirak ediblər.

Konqres çərçivəsində neyrobiologiya, mərkəzi sinir sisteminin patologiyaları, beyin zədələnmələrinin bərpası və neyroreabilitasiya kimi aktual istiqamətlər üzrə müxtəlif ölkələrin qabaqcıl klinik təcrübələri dinlənilib.

Elmi-praktik konqres Azərbaycan Respublikası Səhiyyə Nazirliyi tərəfindən akkreditasiya olunaraq Davamlı Tibbi Təhsil (DTT) çərçivəsində 12 DTT balı ilə qiymətləndirilib.