Aztibb.az xəbər verir ki, Ağdaş rayon sakini, 25 may 2026-cı il təvəllüdlü körpədə dünyaya gəldikdən dərhal sonra tənəffüs çatışmazlığı əlamətləri müşahidə olunub. İlkin tibbi yardım göstərilsə də, vəziyyətində yaxşılaşma müşahidə edilmədiyindən valideynlərin istəyi ilə ETPİ-na köçürülüb.

 

İnstitutun Yenidoğulmuşların Reanimasiya və İntensiv Terapiya şöbəsində şöbə müdirinin nəzarət ilə həkim reanimatoloq Şəlalə Həsənova tərəfindən müayinə olunan körpəyə yenidoğulmuşun tənəffüs çatışmazlığı, anadangəlmə pnevmoniya, perinatal dövr üçün spesifik infeksiya və pulmonar hipertenziya diaqnozları qoyulub. Qəbul zamanı vəziyyəti olduqca ağır qiymətləndirilən körpədə tənəffüs çatışmazlığı və sianoz əlamətləri müşahidə olunub. Monitor göstəricilərdə ciddi dəyişikliklər qeyd olunub.

 

Həkim-neonatoloqların nəzarəti altında aparılan intensiv müalicə və kompleks tibbi tədbirlər nəticəsində körpənin vəziyyəti mərhələli şəkildə stabilləşib. Müalicənin davamı Yenidoğulanların Patologiyası şöbəsində aparılıb. Şöbə müdirinin nəzarəti ilə müalicə həkimi Aygün Manafova tərəfindən aparılan planlı müalicədən sonra uşağın vəziyyəti yaxşılaşıb, çəkisini artırıb. Körpənin valideynləri göstərilən yüksək tibbi xidmətə, həssas münasibətə və peşəkar yanaşmaya görə ETPİ-nin rəhbərliyinə, həkim və tibb personalına dərin minnətdarlıqlarını bildiriblər.