Azərbaycan Qida Təhlükəsizliyi İnstitutunun (AQTİ) Mərkəzi Fitosanitar Laboratoriyasının molekulyar bioloqu Fidan Verdiyeva Avropa Qida Təhlükəsizliyi Agentliyinin (EFSA) təşkilatçılığı ilə keçirilən Xylella fastidiosa üzrə 5-ci Avropa Konfransında iştirak edib.

AQTİ-dən Aztibb.az-a bildirilib ki, İtaliyanın Bari şəhərində təşkil olunan beynəlxalq konfransda karantin tətbiq edilən və dünya üzrə kənd təsərrüfatı bitkiləri üçün ciddi təhlükə yaradan Xylella fastidiosa bakteriyasının diaqnostikası, epidemiologiyası, həşərat vektorları ilə qarşılıqlı əlaqəsi, nəzarət və idarəetmə strategiyaları, həmçinin bu istiqamətdə həyata keçirilən beynəlxalq tədqiqat layihələrinin nəticələri müzakirə olunub.

Tədbir çərçivəsində AQTİ-nin əməkdaşı laboratoriyada aparılmış diaqnostik tədqiqatların nəticələrinə əsaslanan poster təqdimatı ilə çıxış edərək ölkəmizdə Xylella fastidiosa bakteriyasının monitorinqi istiqamətində görülən elmi-praktiki işlər barədə beynəlxalq mütəxəssislərə ətraflı məlumat verib.

Konfrans proqramı çərçivəsində iştirakçılar üçün Xylella fastidiosa bakteriyası ilə yoluxmuş ərazilərə səfər də təşkil olunub. Səfər zamanı mütəxəssislər xəstəliyin sahədə təzahür formalarını, yayılma dinamikasını, nümunə götürmə prosedurlarını və sahə diaqnostikasının xüsusiyyətlərini birbaşa müşahidə etmək imkanı əldə ediblər.