ATU-nun Tədris Cərrahiyyə Klinikasında nadir rast gəlinən mürəkkəb patologiyaları olan pasiyentdə müştərək cərrahi əməliyyat uğurla həyata keçirilib.

Bu barədə Aztibb.az-a Klinikadan bildirilib.

Əməliyyat ATU-nun III Cərrahi Xəstəliklər kafedrasının müdiri, Tədris Cərrahiyyə Klinikasının ümumi cərrahı, professor Fariz Camalovun rəhbərliyi ilə icra olunub.

Professorun sözlərinə görə, 1987-ci il təvəllüdlü pasiyentdə döş qəfəsinin sağ plevra boşluğunda yerləşən və ağciyər hilusuna (kökünə) invaziya edən neyrofibroma kompüter tomoqrafiyası müayinəsi zamanı təsdiqlənib.

Cərrahi müdaxilə zamanı 9-cu qabırğaarası sahədən torakotomiya icra olunub. Əməliyyat zamanı törəmənin ilkin görüntülərlə müqayisədə daha böyük ölçüdə və ətraf toxumalara daha geniş yayılmış olduğu müəyyən edilib. Şiş ətraf toxumalarla sıx yapışıqlı olduğundan onun ayrılması texniki baxımdan olduqca çətin olub. Buna baxmayaraq, törəmə diqqətlə disseksiya edilərək tam şəkildə xaric edilib.Bununla yanaşı, pasiyentdə əlavə olaraq böyük ölçülü intramural uşaqlıq fibroması (leyomioma) da aşkarlanıb. Törəmənin ölçüsü və lokalizasiyası nəzərə alınaraq, növbəti mərhələdə uşaqlığın ekstirpasiyası planlaşdırılıb.

Fariz Camalov bildirib ki, döş qəfəsi və qarın boşluğu orqanlarını eyni zamanda əhatə edən bu cür mürəkkəb patologiyalar olduqca nadir hallarda rast gəlinir:“Bu tip müştərək əməliyyatlar həm diaqnostik, həm də cərrahi baxımdan yüksək peşəkarlıq tələb edir. Bu miqyasda kompleks cərrahi müdaxilə sayca çox az icra olunur”.