Mərkəzi Afrika Respublikasında (MAR) vəba epidemiyası səbəbindən 24 nəfər həyatını itirib.

Aztibb.az english.news.cn-ə istinadən xəbər verir ki, ölkənin səhiyyə və əhali naziri Pyer Somse bildirib ki, bu günə qədər 197 vəbaya yoluxma, həmçinin 24 ölüm halı qeydə alınıb, ölüm səviyyəsi 12,2 %-dir.

Nazirin sözlərinə görə, xəstələnənlərə lazımi tibbi yardım göstərilir. Epidemiyanın mərkəzinin ölkənin cənub-qərbindəki Bimbo və Mbaiki dairələrində yerləşdiyi bildirilib. İlk xəstəliyə yoluxma halı iyunun 14-də aşkar edilib.

Ümumdünya Səhiyyə Təşkilatının məlumatına görə, Afrikanın 14 ölkəsində vəba epidemiyası qeydə alınıb. Onlardan ən genişmiqyaslısı Konqo Demokratik Respublikasının ərazisində baş verib, burada 2026-cı ilin əvvəlindən 21 min xəstə qeydə alınıb, onlardan 726 nəfəri ölüb.