Miqren zamanı kola içməyin faydalı olduğu barədə yayılan fikirlər hər zaman doğru deyil. Terapevt Denis Prokofyev bildirib ki, bəzi hallarda bu içki baş ağrısını yüngülləşdirə bilsə də, əksər hallarda ciddi sağlamlıq riskləri yarada bilər.

Aztibb.az "Medikforum"a istinadən yazır ki, həkimin sözlərinə görə, kola tərkibindəki kofein və şəkər sayəsində yalnız nadir hallarda, arterial təzyiqin 90/60 mm civə sütunundan aşağı düşdüyü hipotoniya zamanı vəziyyəti yaxşılaşdıra bilər. Belə hallarda bəzi dərmanların kola ilə qəbul edilməsi tövsiyə oluna bilər. Lakin bu vəziyyət geniş yayılmayıb.

Mütəxəssis vurğulayıb ki, miqren daha çox yüksək qan təzyiqi və ya hipertonik kriz fonunda inkişaf edir. Belə vəziyyətdə kofeinli içkilərin qəbulu arterial təzyiqi daha da yüksəldə bilər ki, bu da infarkt və insult riskini artırır.

Qeyd edib ki, kolanın kömək edə biləcəyi digər hal qanda şəkərin kəskin azalması – hipoqlikemiyadır. Bəzi diabet xəstələri xüsusi qlükoza preparatları olmadıqda müvəqqəti olaraq bu üsuldan istifadə edə bilirlər.

Həkim sonda xəbərdarlıq edib ki, qan təzyiqini və ya qanda şəkərin səviyyəsini ölçmədən kolanı müalicə vasitəsi kimi qəbul etmək düzgün deyil. Onun sözlərinə görə, diaqnoz qoyulmadan belə üsula əl atmaq sağlamlıq üçün ciddi risk yarada bilər.