Görmə qüsurlarının korreksiyası üçün hansı üsulun daha uyğun olduğu sualı pasiyentlər arasında ən çox verilən mövzulardan biridir.

Aztibb.az "Life" portalına istinadən yazır ki, oftalmoloq, professor Vyaçeslav Kurenkov bildirib ki, görmənin korreksiyası üçün hər kəsə uyğun universal üsul yoxdur.

Onun sözlərinə görə, eynək, kontakt linza və lazer korreksiyasını avtomobil, qatar və təyyarə ilə müqayisə etmək olar. Hər birinin öz üstünlükləri var və seçim pasiyentin fərdi xüsusiyyətlərinə əsasən edilməlidir. Həkimin əsas məqsədi mütləq əməliyyat aparmaq deyil, konkret insan üçün ən təhlükəsiz və effektiv həlli seçməkdir.

Professor qeyd edib ki, eynək xüsusilə uşaqlar üçün ən təhlükəsiz və geniş istifadə olunan üsuldur. O, gözlə birbaşa təmasda olmur, xüsusi qulluq tələb etmir və istənilən yaşda istifadə oluna bilər. Lakin periferik görməni müəyyən qədər məhdudlaşdıra, dumanlana və idman zamanı narahatlıq yarada bilər.

Kontakt linzalar isə daha təbii görmə və hərəkət sərbəstliyi təmin etsə də, ciddi gigiyena qaydalarına əməl olunmasını tələb edir. Linzaların istifadə müddətini aşmaq və ya qulluq qaydalarına əməl etməmək göz iltihablarının yaranma riskini artırır.

Lazer korreksiyası getdikcə daha çox tətbiq olunsa da, bu üsul hər kəs üçün uyğun deyil. Həkim vurğulayıb ki, uğurlu nəticənin əsas şərti əməliyyatdan əvvəl aparılan dəqiq diaqnostik müayinədir. Məhz bu müayinələr pasiyentin lazer əməliyyatı üçün uyğun olub-olmadığını müəyyən edir.

Mütəxəssis insanlara seçim edərkən internetdəki rəylərə deyil, peşəkar oftalmoloqun rəyinə güvənməyi tövsiyə edib. Onun fikrincə, düzgün müalicə ən dəbli texnologiya deyil, konkret pasiyent üçün təhlükəsiz və effektiv olan üsuldur.