Amerikalı alimlərin apardıqları yeni araşdırma göstərib ki, gün ərzində uzun müddət oturaq həyat tərzi sürən insanlarda, hətta müntəzəm gəzintilər belə ürək sağlamlığını tam qoruya bilmir.

Aztibb.az "Veçernyaya Moskva" qəzetinə istinadən yazır ki, 15 min könüllünün iştirak etdiyi və fitnes bilərzikləri vasitəsilə aparılan tədqiqat zamanı müəyyən edilib ki, iştirakçılar gündə orta hesabla 7,4 min addım atsalar da, günün təxminən 12 saatını oturaq vəziyyətdə keçirirlər. Bu isə ürəyin işemik xəstəliyi riskinin yüksək olaraq qalmasına səbəb olur.

Mütəxəssislərin fikrincə, oturaq həyat tərzi şəkərli diabet, arterial hipertoniya, piylənmə, qaraciyərin piylənməsi, depressiya və ürək-damar xəstəlikləri ilə sıx əlaqəlidir.

Araşdırmada qeyd olunur ki, gündə 8 min addım bəzi xəstəliklərin riskini azalda bilər. Lakin ürəyin işemik xəstəliyi riskində nəzərəçarpacaq azalma yalnız 12 min addım atıldıqda müşahidə edilir. Bununla yanaşı, həddindən artıq fiziki aktivlik də bəzi göstəricilərin yenidən pisləşməsinə səbəb ola bilər.

Kardioloq Yuri Serebryanski açıqlamasında bildirib ki, uzun müddət oturmaq qan dövranını zəiflədir və tromb əmələ gəlməsi riskini artırır.

Onun sözlərinə görə, fiziki aktivlik oturaq həyat tərzinin zərərini müəyyən qədər azalda bilər, lakin məşqlər mütləq orta intensivlikdə və nəzarət altında həyata keçirilməlidir.

Həkim fiziki məşqlərə başlamazdan əvvəl, xüsusilə ürək xəstəliyi olan şəxslərin EKQ, 24 saatlıq Holter monitorinqi və exokardioqrafiya kimi müayinələrdən keçməsini tövsiyə edib.

"Fiziki yüklənmə mütləq ölçülü və nəzarət altında olmalıdır. Bunun üçün gündəlik addım sayını və nəbzi izləyən müxtəlif cihazlardan istifadə etmək məqsədəuyğundur", – deyə kardioloq bildirib.

Mütəxəssis əlavə edib ki, iş masası arxasında belə ayaqlar üçün nəzərdə tutulmuş xüsusi hərəkət platformalarından istifadə etməklə ayaq əzələlərini işlətmək və qan dövranını yaxşılaşdırmaq mümkündür.

Bununla belə, həkim vurğulayıb ki, uzun müddət fasiləsiz oturmağın sağlamlığa mənfi təsirini tam şəkildə kompensasiya etmək mümkün deyil. Buna görə də əsas məqsəd gün ərzində hərəkətsiz qalma müddətini azaltmaq, mütəmadi olaraq ayağa qalxmaq və hərəkət etmək olmalıdır.