Bakı və Sumqayıt şəhərlərindəki reabilitasiya müəssisələrində bərpa müalicə kursu keçən əlilliyi olan şəxslər üçün yoqa festivalı təşkil olunub.

Aztibb.az-ın xəbərinə görə, “İçərişəhər” Dövlət Tarix-Memarlıq Qoruğu İdarəsi ilə əməkdaşlıqda Şirvanşahlar Sarayının ərazisində açıq havada təşkil edilən festivalda məqsəd sağlam həyat tərzinin təşviqi, əlilliyi olan şəxslərin psixoloji rifahının və ümumi sağlamlığının dəstəklənməsi, habelə onların sosial-psixoloji adaptasiyasının gücləndirilməsi olub.

Festival iştirakçılarına yoqa məşqləri və nəfəs texnikaları öyrədilib, onların fiziki aktivliyinin artırılmasına və emosional rahatlığının təmin olunmasına dəstək göstərilib.

Yoqa üzrə mütəxəssis Sevindik Mehdiyevin rəhbərliyi ilə keçirilən təlimlər iştirakçılar tərəfindən maraqla qarşılanıb.

Yoqa ilə müntəzəm məşğul olmaq emosional vəziyyətin yaxşılaşmasına, stressin azalmasına, ürək-damar və tənəffüs sisteminin fəaliyyətinin dəstəklənməsinə müsbət təsir göstərir. Bu baxımdan alternativ reabilitasiya metodlarının təşviqi məqsədilə Agentlik tərəfindən mütəmadi olaraq yoqa təlimləri təşkil olunur.