Antibiotiklərin "ehtiyat üçün" təyin edilməsi vərdişi dərmanlara davamlı bakteriyaların daha sürətlə yayılmasına səbəb ola bilər.

Aztibb.az xəbər verir ki, bu nəticə "Clinical Microbiology and Infection" jurnalında dərc olunan yeni elmi araşdırmada öz əksini tapıb.

Tədqiqat müəllifləri bildirirlər ki, antibiotiklərin profilaktik məqsədlə istifadəsi bəzi hallarda həqiqətən də insanların həyatını xilas edə bilər. Lakin son illərdə bu preparatlar təsdiqlənmiş bakterial infeksiyası olmayan şəxslərə də getdikcə daha çox təyin olunur. Alimlərin fikrincə, bu yanaşma orqanizmin normal mikroflorasına ciddi təzyiq göstərir və müalicəyə cavab verməyən, antibiotiklərə davamlı bakteriyaların yaranmasına şərait yaradır.

Məqalədə antibiotiklərin profilaktik məqsədlə istifadə edildiyi bir sıra geniş yayılmış hallar təhlil olunub. Bunlara virus mənşəli pnevmoniya zamanı antibiotiklərin təyin edilməsi, bəzi infeksiyalara yoluxma riski yarandıqdan sonra doksisiklinin istifadəsi, bağırsaq infeksiyalarının profilaktikası, eləcə də streptokokk infeksiyası olan xəstələrlə təmasda olmuş şəxslərin antibiotiklə müalicəsi daxildir. Tədqiqatda təqdim olunan nümunələrdən birində cəmi bir xəstələnmə halının qarşısını almaq üçün təxminən 580 sağlam insana antibiotik təyin edildiyi qeyd olunur.

Tədqiqatçılar hesab edirlər ki, tibb ictimaiyyəti bu praktikaya yenidən baxmalıdır. Onların fikrincə, "ehtiyatlı olmaq daha yaxşıdır" prinsipi əvəzinə, antibiotiklər yalnız faydasını təsdiqləyən kifayət qədər elmi sübut olduqda təyin edilməlidir. Həmçinin mümkün olduqda dar təsir spektrinə malik preparatlara üstünlük verilməli və müalicə müddəti minimum zəruri həddə saxlanmalıdır.

Alimlərin sözlərinə görə, bakteriyaların antibiotiklərə qarşı davamlılığı artıq qlobal səhiyyə üçün ən ciddi təhlükələrdən birinə çevrilib. Bu səbəbdən mövcud antibiotiklərin effektivliyini qoruyub saxlamaq, yeni dərmanların hazırlanması qədər mühüm əhəmiyyət daşıyır.