Yüksək hava temperaturu, xüsusilə də 35 dərəcədən yuxarı olduqda, smartfonların işində problemlər ciddi sağlamlıq təhlükəsi yaradır.

Aztibb.az "İzvestiya" nəşrinə istinadən yazır ki, ekspertlərin sözlərinə görə, həddindən artıq istilik cihazın istiliyi xaric etməsini çətinləşdirir ki, bu da performansın zəifləməsinə, bəzi hallarda isə telefonun özünü qorumaq məqsədilə avtomatik sönməsinə səbəb ola bilər.

Mütəxəssis qeyd edib ki, yay aylarında smartfonlar əksər modellərin uzun müddət işləməsi üçün nəzərdə tutulmadığı şəraitdə istifadə olunur. Müasir smartfonlar üçün optimal istismar temperaturu adətən 0–35 dərəcə arasında dəyişir.

Telefon uzun müddət birbaşa günəş şüaları altında və ya avtomobil salonu kimi qızmış mühitdə qaldıqda, onun temperaturu təhlükəsiz həddi aşa bilər. İsti havada cihaz təkcə ətraf mühitin təsiri ilə deyil, həm də öz fəaliyyətinə görə qızır. Belə ki, prosessor, ekran, rabitə modulu və batareya işlədikcə istilik əmələ gətirir, yüksək temperatur isə bu istiliyin xaric olunmasını çətinləşdirir.

Həddindən artıq qızan smartfonlar batareyanın zədələnməsinə səbəb ola bilər ki, bu da bəzi hallarda tüstülənmə, alovlanma və hətta partlama ilə nəticələnə bilər. Belə vəziyyətlərdə telefonla danışarkən cihazın üz və göz nahiyəsinə yaxın olması ciddi yanıq xəsarətləri və göz zədələnmələri riski yaradır.

Mütəxəssislər isti havalarda qızmış telefonu birbaşa günəş altında istifadə etməməyi, şarj zamanı uzun müddət danışmamağı və cihaz həddindən artıq isinərsə, soyuyana qədər istifadəni dayandırmağı tövsiyə edirlər.