"Üçüncü insan" fenomeni adlandırılan hal adətən insanın həyatı üçün ciddi təhlükə yarandığı, ekstremal sağqalma şəraitində meydana çıxır. Belə vəziyyətlərdə ölüm təhlükəsi ilə üz-üzə qalan şəxs yanında görünməyən bir yol yoldaşının və ya köməkçinin olduğunu hiss edə bilər.

Aztibb.az "Primamedia" nəşrinə istinadən yazır ki, psixoloq Olqa Arabinanın sözlərinə görə, bu, mistik hadisə deyil, beynin həddindən artıq stress, fiziki tükənmə və ölüm təhlükəsinə verdiyi qoruyucu reaksiyadır.

Mütəxəssis bildirir ki, belə anlarda psixika insanı ruhlandıran, istiqamət verən və təslim olmasına imkan verməyən görünməz bir köməkçi obrazı yarada bilər. Bu hal disosiasiyanın bir forması kimi qiymətləndirilir. Belə ki, sağqalmağa cavabdeh olan şüur hissəsi sanki ayrılır və insan tərəfindən kənardan gələn bir səs və ya görünməz varlığın mövcudluğu kimi qəbul edilir.

Psixoloqun sözlərinə görə, bu daxili dayaq mexanizmi panikanın azalmasına, diqqətin qorunmasına və insanın irəliləməyə davam etməsinə kömək edir. Məhz bu səbəbdən "üçüncü insan" fenomeni bəzi hallarda ağır sınaqlarla üzləşən insanların sağ qalmasına psixoloji dəstək verən müdafiə mexanizmlərindən biri hesab olunur.