Beynəlxalq akademik əməkdaşlığın genişləndirilməsi və ekoloji standartların tətbiqi istiqamətində mühüm addım olaraq, Azərbaycanın aparıcı ali təhsil müəssisələrinin yüksək səviyyəli nümayəndə heyəti Cakartada "UI GreenMetric Dünya Universitetləri Reytinqi"nin sədri doktor Vişnu Cuvono ilə strateji görüş keçirib.

Görüşdə əsas diqqət "yaşıl reytinq" meyarlarına, universitet şəhərciklərində (kampuslarda) davamlı inkişaf prinsiplərinin tətbiqinə və gələcək tərəfdaşlıq imkanlarının araşdırılmasına yönəlib.

Azərbaycan Tibb Universitetindən Aztibb.az-a bildirilib ki, ATU-nun İnnovasiya və keyfiyyətin idarə olunması şöbəsinin müdiri Aygün Babayeva və I mamalıq-ginekologiya kafedrasının əməkdaşı Aynur Rzayeva təmsil ediblər. ATU nümayəndələri ekoloji meyarların tibb təhsili çərçivəsinə inteqrasiya edilməsinin vacibliyini vurğulayıblar.

Tədbirin əhəmiyyətini həmçinin Azərbaycan Dövlət İqtisad Universitetinin (UNEC) rəhbərliyinin iştirakı daha da artırıb. Görüşdə UNEC-in rektoru professor Ədalət Muradov və beynəlxalq əlaqələr üzrə prorektor Hüseyn Hüseynov yaxından iştirak ediblər.

Müzakirələr zamanı Azərbaycan universitetlərində resurslardan səmərəli istifadə və karbon qazı tullantılarının azaldılması istiqamətində “UI GreenMetric” metodologiyasından necə yararlanmaq mümkün olduğu barədə fikir mübadiləsi aparılıb. Doktor Vişnu Cuvono nümayəndə heyətini salamlayaraq, qlobal ekoloji problemlərin həllində beynəlxalq akademik ittifaqların mühüm rolunu qeyd edib.