Dövlət Gömrük Komitəsinin Tibbi Xidmət İdarəsinin İnzibati İdarəetmənin təşkili şöbəsinin və Elmi-Təcrübi və Tədris Mərkəzinin birgə təşkilatçılığı ilə “Xəstəxana üzrə kağızsız məlumat mübadiləsi” mövzusuna həsr olunan təlim keçirilib.

 

Bu xəbər Aztibb.az-a Mərkəzi Gömrük Hospitalından verilib.

 

Təlimdə Tibbi Xidmət İdarəsinin və Mərkəzi Gömrük Hospitalının rəhbər heyəti, struktur bölmə rəhbərləri, şöbə rəisləri və əməkdaşlar iştirak ediblər.

 

Tibbi Xidmət İdarəsinin rəis müavini Şahlar Mirqasım təlim iştirakçılarını salamlayıb və təlimin məqsədinin əməkdaşların rəqəmsal sistemlərdən səmərəli istifadə bacarıqlarının inkişaf etdirilməsi, elektron idarəetmə prosesləri haqqında məlumatlılığının artırılması və kağızsız iş prinsiplərinin tətbiqi ilə bağlı biliklərinin təkmilləşdirilməsi olduğunu vurğulayıb. O, təlim vasitəsilə əməkdaşların müasir texnoloji həllərin iş proseslərinə inteqrasiyası, məlumatların daha çevik və təhlükəsiz idarə olunması istiqamətində məlumatlandırılmasının vacib əhəmiyyət kəsb etdiyini qeyd edib.

 

Daha sonra təlimdə çıxış edən Tibbi Xidmət İdarəsinin İnzibati idarəetmənin təşkili şöbəsinin inspektoru Lamiyə Abdinova mövzu ilə bağlı təqdimatla çıxış edərək iştirakçılara kağızsız məlumat mübadiləsinin tətbiqi, elektron sənəd dövriyyəsinin təşkili, məlumatların təhlükəsiz idarə olunması və rəqəmsal sistemlərdən səmərəli istifadə qaydaları barədə ətraflı məlumat verib. Təqdimat zamanı elektron sənədlərlə işləmə prinsipləri, xəstə məlumatlarının məxfiliyinin qorunması, istifadəçi hesablarının təhlükəsizliyi və əməkdaşların rəqəmsal sistemlərdən istifadə zamanı məsuliyyətləri diqqətə çatdırılıb. Həmçinin kağızsız məlumat mübadiləsinin iş proseslərinin sürətləndirilməsi, sənədlərin daha operativ idarə olunması, məlumatların dəqiqliyinin artırılması və tibbi xidmətlərin keyfiyyətinin yüksəldilməsindəki rolu vurğulanıb.

 

Təlim zamanı iştirakçıların mövzu ilə bağlı sualları cavablandırılıb və qarşılıqlı fikir mübadiləsi aparılaraq təlim yekunlaşdırılıb.