Son illərdə melatonin yuxu keyfiyyətinin yaxşılaşdırılması üçün ən çox istifadə edilən reseptsiz preparatlardan birinə çevrilib. Lakin yeni araşdırmanın ilkin nəticələri bu əlavənin uzunmüddətli qəbulunun ürək sağlamlığı üçün müəyyən risklər yarada biləcəyini göstərir.

Aztibb.az "Circulation" jurnalında dərc olunan tədqiqatın nəticələrinə diqqət çəkib. 

Melatonin beyin tərəfindən əsasən gecə saatlarında ifraz olunan hormondur və orqanizmin bioloji saatının tənzimlənməsində mühüm rol oynayır. Bir çox insan daha tez yuxuya getmək və yuxunun keyfiyyətini artırmaq məqsədilə sintetik melatonin preparatlarından istifadə edir. Bu vasitə bir sıra ölkələrdə reseptsiz satılır.

Tədqiqat müəllifləri yuxusuzluqdan əziyyət çəkən 130 mindən çox ABŞ və Böyük Britaniya vətəndaşının elektron tibbi məlumatlarını təhlil ediblər. Nəticələr göstərib ki, melatonini bir ildən artıq müddətdə qəbul edən şəxslərdə növbəti beş il ərzində ürək çatışmazlığının inkişaf riski digər iştirakçılarla müqayisədə 89 faiz daha yüksək olub.

Araşdırma həmçinin göstərib ki, uzunmüddətli melatonin istifadəçilərində bütün səbəblərdən ölüm riski təxminən iki dəfə, ürək çatışmazlığı səbəbindən xəstəxanaya yerləşdirilmə ehtimalı isə 3,5 dəfə daha yüksək olub.

Bununla belə, tədqiqat melatonin qəbulu ilə ürək çatışmazlığı arasında birbaşa səbəb-nəticə əlaqəsini sübut etmir. Alimlər hesab edirlər ki, əldə olunan nəticələrin təsdiqlənməsi və mümkün mexanizmlərin aydınlaşdırılması üçün əlavə araşdırmalara ehtiyac var.

Mütəxəssislərin fikrincə, melatonin qısamüddətli istifadə zamanı adətən 1–2 ayadək qəbul edildikdə təhlükəsiz hesab olunur. Lakin uzunmüddətli istifadənin potensial təsirlərinin daha dərindən öyrənilməsi vacibdir.