Samux Rayon Mərkəzi Xəstəxanası və Medic School Training Center-in birgə təşkilatçılığı ilə Amerika Ürək Assosiasiyasının (AHA) standartlarına uyğun BLS (Basic Life Support) təlim proqramı uğurla keçirilib.

 

Xəstəxanadan Aztibb.az-a bildirilib ki, təlimin əsas məqsədi tibb işçilərinin kardiopulmonar reanimasiya (CPR), erkən defibrilyasiya və həyati təhlükəli vəziyyətlərdə sistemli müdaxilə bacarıqlarının beynəlxalq protokollara uyğun şəkildə təkmilləşdirilməsi olub.

 

Təlim çərçivəsində aşağıdakı mövzular təqdim olunub:

• Zəncirvari sağqalma konsepsiyası (Chain of Survival)

• Huşun və tənəffüsün ilkin qiymətləndirilməsi

• Keyfiyyətli döş qəfəsi kompressiyaları və ventilyasiya texnikası

• Böyüklər, uşaqlar və körpələrdə CPR alqoritmləri

• AED (Automated External Defibrillator) cihazından istifadə qaydaları

• Tənəffüs yolu obstruksiyası (boğulma halları) zamanı ilkin yardım

• Komanda əsaslı reanimasiya və rol bölgüsü prinsipləri.

 

Təlim nəzəri və praktiki hissələrdən ibarət olmaqla, simulyasiya əsaslı metodologiya üzərində təşkil olunub və iştirakçıların klinik qərarvermə bacarıqlarının gücləndirilməsinə xidmət edib.

Proqramın sonunda qiymətləndirmədən uğurla keçən iştirakçılara beynəlxalq standartlara uyğun sertifikatlar təqdim olunub.

 

Bu kimi elmi əsaslı və praktik yönümlü təlim proqramları regionda tibbi xidmətin keyfiyyətinin yüksəldilməsinə və pasiyent təhlükəsizliyinin gücləndirilməsinə mühüm töhfə verir.