Mərkəzi Gömrük Hospitalının Mama-ginekologiya şöbəsinin rəisi, mama-ginekoloq, tibb üzrə fəlsəfə doktoru Təranə Bayramova Dövlət Gömrük Komitəsi Tibbi Xidmət İdarəsinin Mərkəzi Hospitalı ilə Britaniya-Azərbaycan Həkim və Stomatoloqlar Assosiasiyası arasında imzalanmış əməkdaşlıq memorandumu çərçivəsində mama-ginekologiya sahəsində nəzəri biliklərin və praktik bacarıqların artırılması məqsədilə İngiltərənin Birmingem şəhərində yerləşən "Birmingham Women’s and Children’s NHS Foundation Trust" xəstəxanasında təkmilləşmə kursunda iştirak edir.

 

Bu barədə Aztibb.az-a Mərkəzi Gömrük Hospitalından məlumat verilib.

 

Təkmilləşmə proqramının həyata keçirilməsində və təşkilati məsələlərin həllində Britaniya-Azərbaycan Həkim və Stomatoloqlar Assosiasiyasının rəhbəri, Birmingham Women’s and Children’s NHS Foundation Trust xəstəxanasının mama-ginekoloqu Dr. Fidan İsrafilbəylinin fəal təşkilati dəstəyi mühüm rol oynayıb.

 

Ezamiyyətin ilk günlərindən etibarən Dr. Təranə Bayramova xəstəxananın doğuş, erkən hamiləlik, ginekologiya, uroginekologiya, ginekoloji onkologiya, süni mayalanma və təcili yardım şöbələri, eləcə də müəssisənin nəzdində fəaliyyət göstərən elmi-tədqiqat mərkəzinin işi ilə yaxından tanış olub. O, eyni zamanda müasir cərrahi yanaşmalar, yeni texnologiyaların tətbiqi və beynəlxalq klinik protokolların icrası ilə bağlı məlumatlandırılıb.

 

Kurs müddətində müxtəlif cərrahi müdaxilələri müşahidə edən Təranə Bayramova müasir diaqnostika və müalicə metodlarını, multidissiplinar əməkdaşlıq prinsiplərini, pasiyent təhlükəsizliyinin təmin olunması və tibbi xidmətin keyfiyyətinin yüksəldilməsi istiqamətində tətbiq edilən qabaqcıl təcrübələri ətraflı şəkildə araşdırıb.

 

Qeyd edək ki, bu beynəlxalq təcrübə proqramı mama-ginekologiya sahəsində mövcud olan müasir dünya standartlarının, innovativ yanaşmaların və qabaqcıl tibbi təcrübələrin ölkəmizdə tətbiqinə, pasiyentlərə göstərilən tibbi xidmətin daha da təkmilləşdirilməsinə, eləcə də Dövlət Gömrük Komitəsi Tibbi Xidmət İdarəsinin Mərkəzi Hospitalı ilə Britaniya-Azərbaycan Həkim və Stomatoloqlar Assosiasiyası arasında əməkdaşlığın daha da möhkəmləndirilməsinə mühüm töhfə verəcəkdir.