Türkiyəli professor Dr. Osman Müftüoğlu bildirib ki, qarşıdakı 20 ildə ən böyük sağlamlıq mübarizəsi Alzheimer və demensiya sahəsində yaşanacaq.

Aztibb.az "Sabah" qəzetinə istinadən yazır ki, onun sözlərinə görə, hazırda Alzheimer xəstəliyini tam dayandıran və ya kökündən həll edən möcüzəvi bir dərman mövcud deyil: “Lakin əlimizdə daha güclü, daha geniş tətbiq olunan, daha ucuz və erkən mərhələdə istifadə oluna bilən vasitələr var. Gəzmək, yaxşı yatmaq, təzyiqi nəzarətdə saxlamaq.”

Professor qeyd edib ki, yaşlanan dünya üçün əsas sağlamlıq problemləri təkcə infarkt, xərçəng və diabetlə məhdudlaşmır, artıq beyin qocalması, yəni Alzheimer ön plana çıxır.

O əlavə edib ki, bu proses qaçılmaz deyil: “Bu taleyi dəyişmək mümkündür. Bu gün artıq bilirik ki, yüksək təzyiqin nəzarət altına alınması, diabetin qarşısının alınması, siqaretin tərgidilməsi, eşitmə problemlərinin müalicəsi, sosial izoliyasiyanın azaldılması, piylənmənin qarşısının alınması, depressiyanın erkən aşkarlanması, hava çirkliliyinə qarşı mübarizə, fiziki aktivliyin artırılması və təhsil səviyyəsinin yüksəldilməsi demensiya riskini azaldır.”

Professorun sözlərinə görə, beyin qocalması təkcə genetik faktorlarla müəyyənləşmir, burada həyat tərzi, metabolik və damar sağlamlığı, yuxu keyfiyyəti, sosial əlaqələr və zehni fəaliyyət də mühüm rol oynayır.

O vurğulayıb ki, hazırda Alzheimer xəstəliyini tam dayandıran dərman olmasa da, ən təsirli və əlçatan “silahlar” gündəlik həyat vərdişləridir: “Gəzmək, yaxşı yatmaq və təzyiqi nəzarətdə saxlamaq.”

Sonda ekspert bildirib ki, qarşıdakı 20 ilin ən böyük sağlamlıq mübarizəsi Alzheimer və demensiya ilə bağlı olacaq və bu mübarizə yalnız həkimlərin deyil, ailə həkimlərindən tutmuş məktəblərə, iş yerlərinə, media qurumlarına və səhiyyə siyasətçilərinə qədər bütün cəmiyyətin birgə iştirakı ilə aparılmalıdır.