Səhiyyə Nazirliyinin K.Y. Fərəcova adına Elmi-Tədqiqat Pediatriya İnstitutunun (ETPİ) həkimləri vaxtından əvvəl və olduqca ağır vəziyyətdə dünyaya gələn körpənin həyatını xilas ediblər.

Aztibb.az xəbər verir ki, özəl tibb müəssisələrindən birində doğulduqdan dərhal sonra süni tənəffüs aparatına qoşulan körpə, həyatının ilk sutkasında vəziyyətinin kritik olması nəzərə alınaraq ETPİ-nin Yenidoğulanların Reanimasiya və İntensiv Terapiya şöbəsinə təxliyə olunub. Burada həkim-neonatoloq Aynur İsmayılovanın ciddi nəzarəti və intensiv müalicəsi altında 9 gün qalan körpənin vəziyyəti stabilləşdirilib. Daha sonra müalicə prosesi Vaxtından Əvvəl Doğulanların Patologiyası şöbəsində həkim Səbinə İsa-zadə tərəfindən uğurla davam etdirilib.

Aparılan kompleks tibbi müayinələr nəticəsində cəmi 1350 qram çəki ilə doğulmuş körpəyə tənəffüs çatışmazlığı, anadangəlmə pnevmoniya, neonatal sarılıq və anemiya diaqnozları qoyulub. İnstitutun peşəkar tibb heyətinin tətbiq etdiyi düzgün müalicə protokolları və göstərilən xüsusi qayğı sayəsində körpənin sağlamlığında sürətli müsbət dinamika qeydə alınıb. Gündən-günə güclənən və çəkisini 1990 qrama çatdıran balaca qəhrəman, ümumi vəziyyəti tam qənaətbəxş qiymətləndirilərək ailəsinə qovuşdurulub və evə buraxılıb.

Şəhid Fərid İzzətlinin anası Kəmalə Cabbarova, eləcə də körpənin valideynləri övladlarının sağalması üçün gecə-gündüz çalışan, yüksək səviyyəli tibbi yardım və ana nəvazişi göstərən ETPİ rəhbərliyinə, müalicə həkimlərinə və bütün tibb heyətinə dərin minnətdarlıqlarını ifadə ediblər.