Seçenov Universitetinin tədqiqatçılarından ibarət komanda müəyyən edib ki, işemik insultdan sonra bərpa prosesində beynin yaşa bağlı immun reaksiyası əsas rol oynayır və bu reaksiya yaş artdıqca zəifləyir.

Aztibb.az "Planet today" nəşrində dərc olunan araşdırmanın nəticələrinə diqqət çəkib.

İşemik insult damarların tıxanması nəticəsində beynin oksigensiz qalması və toxumaların zədələnməsi ilə xarakterizə olunur. Lakin ilkin zədədən sonra yaranan ikinci mərhələ neyroiltihab prosesi xəstəliyin gedişində daha ağır nəticələrə səbəb ola bilir. Bu proses orqanizmin işemiyaya qarşı immun cavabı kimi inkişaf edir və sinir toxumasının əlavə zədələnməsinə gətirib çıxarır.

Alimlər insultdan sonra ilk günlərdə zədələnmiş sahənin ətrafında yaranan iltihabi reaksiyanın necə dəyişdiyini öyrənmək üçün insultdan və ya digər səbəblərdən vəfat etmiş 184 xəstənin beyin toxuması nümunələrini analiz ediblər.

Nəticələr göstərib ki, yaşlı xəstələrdə damar sistemi ilə immun sistem arasında koordinasiya pozulur və bərpa mexanizmləri daha zəif işləyir. Bu da reabilitasiya prosesinin effektivliyini azaldır və sağalma sürətinə birbaşa təsir göstərir.

Tədqiqatçılar qeyd edirlər ki, yaş artdıqca beynin immun cavabının zəifləməsi insultdan sonra funksional bərpanın daha çətin və ləng getməsinin əsas səbəblərindən biridir.