Azərbaycan Tibb Universitetinin (ATU) professoru Türkiyənin Ərzurum şəhərində ilə keçirilən “Modern İpək Yolu Üzərində Türk Dövlətlərinin Siyasi və İqtisadi İnteqrasiya Prosesləri: Çətinliklər və Perspektivlər” adlı beynəlxalq elmi konfransda məruzə ilə çıxış edib.

 

 

Bu məlumat Aztibb.az-a ATU-dan verilib.

 

Bildirilib ki, ATU-nun İctimai fənlər kafedrasının müdiri, professor Qoşqar Əliyev “Böyük İpək Yolu: bəşəriyyətin tərəqqi yolu və Azərbaycanın tarixi-strateji əhəmiyyəti” mövzusunda məruzəsində bir çox məqamlara toxunub.

 

Məruzədə Azərbaycanın tarixi İpək Yolu üzərində yerləşməsi, Şərq və Qərb arasında mədəni körpü rolunu oynaması, müxtəlif sivilizasiyalar arasında qarşılıqlı təsirin formalaşmasına verdiyi töhfələr, eləcə də ölkəmizin müasir dövrdə türk dünyasının inteqrasiyası və beynəlxalq əməkdaşlıq proseslərində oynadığı rol elmi əsaslarla təhlil edilib.

 

Türkiyə, Azərbaycan və digər türk dövlətlərindən olan alimlərin iştirak etdiyi konfransda ATU əməkdaşına elmi məruzə və fəal iştirakına görə Atatürk Universiteti tərəfindən təşəkkürnamə təqdim olunub.