Azərbaycan Respublikası Səhiyyə Nazirliyinin K.Y. Fərəcova adına Elmi-Tədqiqat Pediatriya İnstitutunun Yenidoğulmuşların Reanimasiya və İntensiv Terapiya şöbəsinə 29.05.2026-cı il təvəllüdlü 3 günlük körpə olduqca ağır vəziyyətdə qəbul olunub.

 

Bu xəbər Aztibb.az-a Elmi-Tədqiqat Pediatriya İnstitutundan verilib.

 

Bildirilib ki, körpəyə qida borusunun atreziyası, distal traxeoezofagial fistul, aspirasion pnevmoniya, tənəffüs çatışmazlığı, hestasiya yaşına görə az kütləli yenidoğulmuş diaqnozları qoyulub.

 

Anamnezə əsasən, uşaq ailənin ikinci hamiləliyindən, ikinci doğuşundan olub. 39 həftəlik hestasiya yaşında təbii doğuş yolu ilə 2400 qram bədən çəkisi ilə dünyaya gəlib. Körpə qəbul olunduqdan dərhal sonra institutun Yenidoğulmuşların Reanimasiya və İntensiv Terapiya şöbəsinə yerləşdirilib. Şöbə müdiri Xuraman Məmmədovanın nəzarəti altında, müalicə həkimi Leyla Abdullayeva tərəfindən müvafiq müayinələr aparılıb və cərrahi müdaxiləyə hazırlanıb.

 

02.06.2026-cı il tarixində Uşaq cərrahiyyəsi şöbəsinin müdiri Umud Musayevin rəhbərliyi ilə, uşaq cərrahı Dünya Əzizovanın assistentliyi və Anesteziologiya şöbəsinin müdiri Nailə Səlimovanın iştirakı ilə cərrahi əməliyyat uğurla icra olunub. Əməliyyat zamanı sağ tərəfli torakotomiya, distal traxeoezofagial fistulun ləğvi, ezofaqo-ezofagial anastomozun qoyulması və döş boşluğunun drenajı həyata keçirilib.

 

Xəstə küvez şəraitində, monitor nəzarətində saxlanılıb. Süni ventilyasiya aparatının (SVA) NİV rejimində respirator dəstək alıb.

 

Hal-hazırda xəstənin vəziyyəti stabildir. Tənəffüsü spontandır. Qidalandırılır qidanı həzm edir. Fizioloji aktları sərbəstdir. Müalicənin müsbət dinamikası nəzərə alınaraq Yenidoğulmuşların Reanimasiya və İntensiv Terapiya şöbəsindən 2 həftədən sonra Uşaq Cərrahiyəsi şöbəsinə köçürülüb, hazırda həkim nəzarəti altında müalicəsi davam etdirilir və yaxın günlərdə evə yazılması planlaşdırılır.

 

Valideynlər körpələrinin sağlamlığına qovuşması istiqamətində göstərilən yüksək ixtisaslı tibbi yardım, yaradılan şərait və diqqətə görə institutun rəhbərliyinə, həmçinin müalicə və əməliyyat prosesində əməyi keçən bütün həkimlərə, tibb işçilərinə və institut kollektivinə dərin minnətdarlıqlarını bildiriblər.