Əmək və Əhalinin Sosial Müdafiəsi Nazirliyinin tabeliyində Dövlət Tibbi-Sosial Ekspertiza və Reabilitasiya Agentliyi əlilliyi olan uşaqlar üçün növbəti hippoterapiya (atlar vasitəsilə terapiya) tədbirləri təşkil edib.

Aztibb.az-a Agentlikdən verilən xəbərə görə, “Baku GoldenHorse Therapeutic and Educational Center” atçılıq mərkəzi ilə birgə təşkil olunan tədbirlərə qurumun reabilitasiya mərkəzlərində bərpa müalicəsi xidmətləri göstərilən uşaqlar cəlb edilib.

Həftədə iki dəfə keçirilən terapiyanın əsas məqsədi at üzərində hərəkət vasitəsilə uşaqlarda bədən əzələlərinin aktivliyini artırmaq, motor bacarıqlarını inkişaf etdirmək, koordinasiya və tarazlığın gücləndirilməsinə dəstək göstərməkdir.

2022-ci ildən etibarən həyata keçirilən hippoterapiya tədbirlərindən indiyədək əlilliyi olan 1500 şəxs faydalanıb.

Beynəlxalq təcrübəyə əsaslanan bu terapiya üsulu əlilliyi olan şəxslərin ümumi əhval-ruhiyyəsinin yüksəldilməsinə, autizm spektr pozuntusu, daun sindromu, serebral iflic, nitq qüsurları və s. olan uşaqların sosial-psixoloji və fizioterapevtik reabilitasiyasına müsbət təsir göstərir.