Böyük Britaniyanın Baş Naziri Boris Conson Birləşmiş Krallıqda koronavirus infeksiyasının yayılmağa başladığı vaxt hökumətin səhvə yol verdiyi fikri ilə razılaşıb.

Aztibb.az xəbər verir ki, Baş Nazir bu sözləri BBC telekanalının efirində deyib. “Biz ilk bir neçə həftə və ay ərzində koronavirusla bağlı problemin ciddiliyini lazımi qədər anlamadıq”, - deyə Boris Conson telekanala müsahibəsində bildirib.

Onun sözlərinə görə, Böyük Britaniya hakimiyyəti pandemiyanın ilkin mərhələsində virusun insandan insana simptomsuz yayılma miqyasını düzgün qiymətləndirməyib. Baş Nazir, həmçinin baş verənlərdən nəticə çıxarılmalı olduğunu da vurğulayıb.

Qeyd edək ki, pandemiyanın statistikasını aparan "Worldometer" saytının son məlumatına görə, Birləşmiş Krallıqda indiyədək 297 min 914 nəfər koronavirusa yoluxub, onlardan 45 min 677 nəfəri həyatını itirib.