Başgicəllənmə müstəqil xəstəlik deyil, müxtəlif sağlamlıq problemlərinin əlamətidir. Onun yaranmasına səbəb olan amillər isə o qədər də çox deyil. Bu barədə nevroloq Mariya Şapovalova danışıb.

Aztibb.az "Arqumentı i faktı" nəşrinə istinadən yazır ki, həkimin sözlərinə görə, başgicəllənmə ilk növbədə vestibulyar aparatın patologiyaları ilə bağlı ola bilər. Bundan əlavə, tarazlığın qorunmasına cavabdeh olan beyin strukturlarının xəstəlikləri də bu əlamətə səbəb ola bilər.

“Buna görə də, əgər insanda, məsələn, insult baş veribsə, bu vəziyyət özünü başgicəllənmə və yeriş zamanı qeyri-sabitliklə göstərə bilər”, – deyə Şapovalova bildirib.

Nevroloq başgicəllənmənin üçüncü səbəbinin psixogen amillərlə əlaqəli olduğunu vurğulayıb. Onun izahına görə, belə hallarda başgicəllənmə nə zahiri görünüşdə, nə də nevroloji müayinə zamanı özünü göstərir. İnsan özünü qeyri-sabit hiss edə, halsızlıq, “başda dumanlanma” hissi yaşaya bilər. Lakin ətrafdakı əşyalar fırlanmır və o, normal şəkildə hərəkət edə bilir.