Hamiləlik dövründə qadınların qorxulu və əsassız məlumatlardan uzaq durması, eyni zamanda mümkün ağırlaşmaların əlamətlərinə diqqət yetirməsi vacibdir.

Aztibb.az xəbər verir ki, rusiyalı mütəxəssislər “İzvestiya”ya açıqlamalarında hamiləliklə bağlı yayılmış miflərdən, həkimə təcili müraciət tələb edən hallardan və narahatlığın gələcək ananın sağlamlığına təsirindən danışıblar.

İnteqrativ psixoloq və travma-terapevt Polina Yurkova bildirib ki, hamilə qadınlarda emosional həssaslığın artması hormonal dəyişikliklər və dölü qoruma instinkti ilə bağlıdır. Xüsusilə ilk hamiləlik dövründə qadınlar mənfi informasiyalara daha həssas yanaşırlar. Buna görə də onların müsbət emosiyalar və xoş təəssüratlarla əhatə olunması mühüm əhəmiyyət daşıyır.

Mütəxəssisin sözlərinə görə, sağlam hamilə qadınların səyahət etməsinin, idmanla məşğul olmasının və ya təyyarə ilə uçmasının qəti şəkildə qadağan edilməsi barədə fikirlər əsasən mifdir. Tibbi göstəriş olmadığı halda aktiv həyat tərzindən imtina etmək qadının həyat keyfiyyətinə mənfi təsir göstərə bilər.

Ekspert ağır doğuşların irsi xarakter daşıdığı barədə yayılan fikirlərin də doğru olmadığını vurğulayıb. O qeyd edib ki, doğuşun gedişi qadının sağlamlıq vəziyyəti, psixoloji hazırlığı və digər fərdi amillərdən asılıdır.

Mütəxəssislər hamilə qadınların bəzi təhlükəli əlamətləri yaxşı tanımasının vacibliyini qeyd edirlər. Arterial təzyiqin 130/90 mm civə sütunundan yuxarı qalxması, qanlı ifrazatlar, qarının aşağı hissəsində müntəzəm ağrılar, dölün hərəkətlərində dəyişikliklər, göz önündə pərdə hissi və bədən hərarətinin 37,5 dərəcədən yuxarı olması təcili tibbi yardım tələb edən siqnallar hesab olunur.

Ekspertlər bildirirlər ki, güclü stress birbaşa dölün ölümünə səbəb olmasa da, arterial təzyiqin təhlükəli səviyyədə yüksəlməsinə gətirib çıxara bilər. İnternetdə qorxulu məlumatların davamlı oxunması isə təşviş, panik ataklar və psixoloji gərginlik yaradır. Nəticədə qadın doğuş başlamazdan əvvəl ciddi emosional tükənmə ilə üzləşə bilər.

Mütəxəssislərin diqqət çəkdiyi digər məqam doğuşdan sonrakı dövrdə müşahidə olunan həddindən artıq narahatlıqdır. Bu hal körpənin nəfəsinin davamlı yoxlanılması, yaxınlara və həkimlərə etimadsızlıq, eləcə də zərurət olmadan çoxsaylı tibbi müayinələrə müraciət etməklə özünü göstərə bilər.

Psixoloqların fikrincə, belə davranış bəzən ağır keçən doğuş və ya ana ilə körpə arasındakı erkən ayrılıq nəticəsində pozulan emosional bağın əvəzlənməsi cəhdi kimi meydana çıxır.