Sağlam həyat tərzinin vacibliyi uşaqlara erkən yaşlardan aşılanmalıdır. Bu fikri Rusiya Səhiyyə Nazirliyinin baş ürək-damar cərrahı, akademik Leo Bokeriya səsləndirib.

Aztibb.az “RIA Novosti” agentliyinə istinadən yazır ki, alim müsahibəsində bildirib ki, uşağa yalnız oxumağı, yazmağı, rəsm çəkməyi və ya musiqi ilə məşğul olmağı öyrətmək kifayət deyil. Valideynlər eyni zamanda ona düzgün qidalanmağı, fiziki aktiv olmağı və sağlam həyat sürməyi də öyrətməlidirlər.

Akademikin sözlərinə görə, bir çox valideynlərin diqqətdən qaçırdığı əsas vəzifələrdən biri insanın ümumi mədəniyyətinin formalaşdırılmasıdır. Bu mədəniyyətin ayrılmaz hissəsi isə sağlam həyat tərzinin əhəmiyyətini dərk etməkdir.

Mütəxəssis vurğulayıb ki, uşaqlıq dövründə qazanılan düzgün vərdişlər gələcəkdə bir çox xəstəliklərin qarşısının alınmasına kömək edir və sağlam cəmiyyətin formalaşmasına xidmət edir.

Akademik onu da qeyd edibki, erkən yaşlarda yuxu çatışmazlığı uşaqlarda yeniyetməlik dövründə depressiya riskini əhəmiyyətli dərəcədə artırır. Bununla bağlı araşdırmaların nəticələri göstərib ki, normadan az yatan uşaqlarda 13–22 yaş arasında depressiyanın inkişaf riski iki dəfə yüksəlir.