Monash Universitetinin alimləri müəyyən ediblər ki, uşaq doğulduqdan sonra valideynlərin yaddaşı və düşünmə qabiliyyəti obyektiv olaraq pisləşmir.

Aztibb.az "Medpedia" nəşrinə istinadən yazır ki. tədqiqatda 300 insan iştirak edilib. Nəticələr göstərib ki, valideynlər yaddaş, diqqət və düşünmə sürəti testlərində uşaqsız insanlardan fərqlənmirlər.

Alimlərin fikrincə, valideynlərin “yaddaşım zəifləyib” hissi daha çox yorğunluq, yuxusuzluq və həddən artıq yüklənmə ilə bağlıdır. Yəni problem beyin funksiyasının pozulması deyil, gündəlik stress və fasiləsiz diqqət dəyişməsidir.

Tədqiqatda həm analar, həm də atalar eyni dərəcədə yoxlanılıb və hər iki qrupda real idrak zəifləməsi aşkarlanmayıb. Hətta atalarda öz yaddaşına inamın azalması müşahidə olunub ki, bu da əsasən yuxusuzluq və yeni məsuliyyətlərlə izah edilir.

Alimlər vurğulayır ki, uşaq doğulduqdan sonra valideynlərin yaddaşının “pisləşməsi” hissi əslində artan və dağınıq gündəlik tapşırıqlardan (yuxu rejiminin pozulması, çoxsaylı işlər, daimi diqqət dəyişimi) qaynaqlanır.

Nəticə olaraq, araşdırma göstərir ki, valideynlik beynin zədələnməsinə səbəb olmur, sadəcə daha ağır və yorucu həyat rejimi yaradır.