Türkiyə Prezidenti Recep Tayyip Erdoğan bildirib ki, “Protürk” layihəsi çərçivəsində həyati əhəmiyyətli dərmanlar artıq Türkiyədə istehsal olunacaq.

Aztibbb.az "Medimagazin"ə istinadən yazır ki, onun sözlərinə görə, bu preparatlardan xərçəng, travma, yanıq, immun sistem xəstəlikləri və hemofiliya kimi xəstəliklərin müalicəsində istifadə ediləcək. Beləliklə, Türkiyə plazmadan kritik dərman istehsal edən ölkələr sırasına qoşularaq bu sahədə xarici asılılığı aradan qaldıracaq.

Prezident Ərdoğan xatırladıb ki, "Türk Kızılayı"ötən il 3 milyondan çox qan ianəsi toplayaraq yeni rekorda imza atıb. O qeyd edib ki, Kızılay səhiyyə sektorunda yerli və milli investisiyalarını uğurla davam etdirir.

R.T.Ərdoğan bildirib ki, Ankaranın Çubuk rayonunda 130 min kvadratmetr sahəni əhatə edən “Protürk” zavodu bu layihələrin ən mühüm nümunələrindən biridir.

“Protürk” layihəsi sayəsində qandan əldə edilən kritik dərmanlar artıq ölkə daxilində istehsal olunacaq. Bu dərmanlar xərçəng, travma, yanıq, immun sistem xəstəlikləri və hemofiliya kimi xəstəliklərin müalicəsində istifadə ediləcək. Bununla da Türkiyə plazmadan həyati əhəmiyyətli dərman istehsal edən ölkələr sırasına daxil olacaq və bu preparatlar üzrə xaricdən asılılığa son qoyacaq”, – deyə Prezident vurğulayıb.

R.T.Ərdoğan layihənin ölkə və xalq üçün faydalı olmasını arzulayaraq, onun həyata keçirilməsində əməyi olan hər kəsə təşəkkür edib.

Prezident qeyd edib ki, hazırda xaricdən idxal olunan qan torbaları da yaxın gələcəkdə Türkiyənin öz imkanları hesabına istehsal ediləcək.

Onun sözlərinə görə, Silivri rayonunda tikilən zavodun yaradılması istiqamətində işlər davam edir. Zavod istifadəyə verildikdən sonra ildə təxminən 3 milyon ədəd qan torbası ölkə daxilində istehsal olunacaq və bununla da təxminən 1 milyard lirə həcmində idxal xərci aradan qalxacaq.

R.T.Ərdoğan əlavə edib ki, yaxın zamanda fəaliyyətə başlayacaq bu investisiyanın da ölkə üçün uğurlu nəticələr verəcəyinə inanır. O, Kızılayın bütün əməkdaşlarına, könüllülərinə və donorlarına minnətdarlığını ifadə edib.