Ümumdünya Səhiyyə Təşkilatının Avropa Regional Bürosu futbol üzrə Dünya Çempionatı ərəfəsində Ebola ilə bağlı riskin aşağı olaraq qaldığını açıqlayıb.

Aztibb.az ÜST-nin məlumatına istinadən yazır ki, regional direktor Dr. Hans Henri P. Klüqe bildirib ki, hazırda nə turnirə ev sahibliyi edən Kanada, Meksika və ABŞ-da, nə də Avropa Regionunda aktiv Ebola halları qeydə alınır və səyahət planlarını dəyişmək üçün əsas yoxdur.

Bununla belə, ÜST azarkeşlərə qızdırma, əzələ ağrıları və qusma kimi simptomlara diqqət yetirməyi tövsiyə edir. Son üç həftə ərzində Konqo Demokratik Respublikasına və ya Uqandaya səfər etmiş şəxslər özlərini pis hiss etdikdə dərhal həkimə müraciət etməlidirlər.

ÜST qeyd edir ki, hazırda Avropa Regionunda aktiv və ya yerli Ebola yoluxması yoxdur. Riskin aşağı olmasının əsas səbəbləri xəstəliyin əsasən Konqo Demokratik Respublikasının ucqar bölgələrində yayılması, çıxış məntəqələrində skrininqin aparılması, virusun hava yolu ilə ötürülməməsi və yalnız xəstə şəxsin bədən mayeləri ilə birbaşa təmas nəticəsində yoluxmasıdır.

Qurum həmçinin vurğulayır ki, Ebola milliyyət və ya etnik mənsubiyyətlə əlaqəli deyil və təsirə məruz qalan regionlardan olan insanlara qarşı ayrı-seçkiliyə yol verilməməlidir.