Azərbaycan Tibb Universitetinin (ATU) nümayəndələri Özbəkistanın Daşkənd şəhərində keçirilən Transxəzər Beynəlxalq Hepato-Pankreato-Biliar Cərrahlar Assosiasiyanın (Transxəzər BHPBA) II beynəlxalq konqresində iştirak edirlər.

 

ATU-dan Aztibb.az-a bildirilib ki, iyunun 13-nə qədər davam edəcək kongresdə Azərbaycan, Özbəkistan, Türkiyədən, Qazaxsıtan, Qırğızstan, Balkan ölkələri və Rusiyadan 300-ə yaxın mütəxəssis iştirak edir.

 

Kongresi dəstəkləyən təşkilatlar arasında TİKA (Türk İşbirliyi və Koordinasiya Agentliyi), Türk və Balkan Hepato-Pankreato-Biliar Cərrahlar Dərnəkləri və Daşkənd Tibb Universiteti var. Konqresin təşkilinə Transxəzər İHBA prezidenti prefossor Nuru Bayramov, konqresin sədrləri professor Mustafa Kerem və professor Oktyabr Teşaev rəhbərlik edirlər.

 

ATU-nun professorları Fariz Camalov, Rüstəm Məmmədov, Mübariz Əliyev, Yusif Əliyev, Elman Tağısoy və dosent Babək Zeynalovun qatıldığı konqresdə öd yolarının zədələnmələri, mədəaltı vəzin xərçəngi, əməliyyatsonrası ağırlaşmaları, kəskin və xroniki pankreatitlər müzakirə olunur. Bundan əlavə, konqresdə qaraciyər metastazları və transplantasiyası, minimal-invaziv cərrahiyyə, Cərrahi

Platforma tədris portalı, Türk HPB məktəbi, Transxəzər İHBA perspektivi və digər məsələlərin müzakirəsi də nəzərdə tutulur.