Azərbaycan patologiya elminin banilərindən olan akademik Cəlil Hüseynovun ailə üzvləri Azərbaycan Tibb Universitetinin Patologiya kafedrasında olublar.

 

Universitetdən Aztibb.az-a bildirilib ki, Patologiya kafedrasının müdiri, professor Ədalət Həsənovun dəvəti ilə baş tutan görüşdə akademikin nəvəsi Elmira Nəcəfova və nəticəsi Tahirə Nəcəfova iştirak ediblər.

 

Ə.Həsənov kafedranın yaranma tarixi, inkişaf yolu və akademik Cəlil Hüseynovun patologiya elminin inkişafındakı müstəsna xidmətləri barədə dəyərli xatirələrini görüş iştiraçıları ilə bölüşüb.

 

Qonaqlar akademik Cəlil Hüseynovun öz əlləri ilə hazırladığı və hazırda Patologiya Muzeyində mühafizə olunan unikal preparatlarla da tanış olublar. Daha sonra babası ilə bağlı xatirələrini paylaşan E.Nəcəfova göstərilən diqqət və səmimi qəbula görə minnətdarlığını ifadə edib.

 

Görüşdə akademik Cəlil Hüseynovun Azərbaycan tibb elminin inkişafındakı xidmətləri bir daha qeyd edilib, onun elmi irsinin qorunması, təbliği və gələcək nəsillərə ötürülməsinin xüsusi əhəmiyyət daşıdığı vurğulanıb.