Karolinska İnstitutunun alimlərinin apardıqları genişmiqyaslı araşdırma göstərib ki, evdə pişik saxlanılması allergiyadan əziyyət çəkən uşaqlarda astmanın gedişatını ağırlaşdırmır.

Aztibb.az xəbər verir ki, tədiqiqatın nəticələri "Medical Xpress" nəşrində dərc olunub.

Tədqiqatın aparıcı müəllifi, Karolinska İnstitutunun postdoktorantı Resti Putri bildirib ki, pişiklə yaşayan uşaqlarda astmanın ağırlıq dərəcəsi, xəstəliyin kəskinləşmə tezliyi, astmaya nəzarət səviyyəsi və ağciyər funksiyası pişik saxlamayan ailələrdə yaşayan uşaqlarla müqayisədə qısa müddətli dövrdə oxşar olub.

Araşdırma zamanı pişiklərin sayının, cinsinin və ya yaşının nəticələrə təsir göstərdiyi də müəyyən edilməyib.

2023-cü ildə başlanılan tədqiqat çərçivəsində 2006–2020-ci illərdə anadan olmuş, yaşı 4–17 arasında dəyişən və astma və ya tənəffüs yolları allergiyası diaqnozu qoyulmuş 30 277 uşaq iki il ərzində müşahidə olunub. Alimlər bu müddətdə diaqnozları, təcili hospitalizasiya hallarını, təyin olunan dərman preparatlarını, spirometriya nəticələrini və astmaya nəzarət testlərinin göstəricilərini izləyiblər.

İsveçdə 2023-cü ildən etibarən pişiklərin qeydiyyatının məcburi olması tədqiqatçılara ailələrdə ev heyvanının olub-olmadığını yüksək dəqiqliklə müəyyən etməyə imkan verib. İştirakçı ailələrin 9,4 faizində pişik saxlanılıb.

Nəticələrə görə, orta və ya ağır astma pişiklə təmasda olan uşaqların 9,6 faizində, pişik saxlamayan ailələrdə yaşayan uşaqların isə 10,1 faizində qeydə alınıb. Astmanın kəskinləşməsi halları müvafiq olaraq 3,3 və 3,5 faiz təşkil edib.

Spirometriya məlumatları mövcud olan 1428 uşağın ayrıca təhlili də ağciyər funksiyası göstəricilərində statistik baxımdan əhəmiyyətli fərqlərin olmadığını göstərib.

Resti Putrinin sözlərinə görə, bunun mümkün izahlarından biri pişik allergenlərinin yalnız evlərdə deyil, məktəblərdə, ictimai nəqliyyatda və digər ictimai məkanlarda da geniş yayılmasıdır. Bu səbəbdən uşaqlar pişik saxlamasalar belə, həmin allergenlərlə mütəmadi təmasda ola bilirlər və qruplar arasında ciddi fərq yaranmır.

Tədqiqat müəllifləri qeyd ediblər ki, araşdırmada uşaqların konkret hansı allergenlərə həssas olduqlarına dair məlumatlar nəzərə alınmayıb. Buna görə də nəticələr bütün allergiya növlərinə eyni şəkildə şamil edilə bilməz.