Rusiya Elmlər Akademiyasının Kosmik Tədqiqatlar İnstitutunun (İKİ RAN) Günəş astronomiyası laboratoriyası Telegram kanalında bildirib ki, Günəşdəki koronal dəlik səbəbindən gələn həftə Yer kürəsində maqnit qasırğaları baş verə bilər.

Aztibb.az xəbər verir ki, “11–12 iyunda koronal dəlikdən yaranan qasırğa olacaq. Bundan sonra isə vəziyyət hələlik tamamilə sakitdir”, — deyə Moskva Şəhər Xəbərləri Agentliyi məlumatı sitat gətirib.

Qeyd olunub ki, Günəşdə baş verən üç partlayışdan birincisinin plazma təsiri artıq müşahidə edilir. İlkin hesablamalara görə, bu buludların Yerə doğru hərəkət edərkən birləşəcəyi gözlənilirdi, lakin bu ssenari təsdiqlənməyib.

Günəşdə baş verən partlayışlar nəticəsində yaranan geomaqnit qasırğaları, insan orqanizminin bioloji ritmlərinə təsir edərək qanın qatılaşmasına və arterial təzyiqin qəfil dəyişməsinə yol açır. Bu kosmik təbiət hadisəsi zamanı meteohəssas insanlarda, xüsusilə ürək-damar xəstələrində kəskin baş ağrıları, halsızlıq, yuxu pozuntusu və infarkt riskinin artması müşahidə olunur.

Mənfi təsirləri minimuma endirmək üçün qasırğalı günlərdə bədənin su balansını artırmaq, duzlu, yağlı qidalardan və sinir sistemini qıcıqlandıran tünd içkilərdən uzaq durmaq şərtdir.

Həmçinin ağır fiziki əməyi və emosional gərginliyi məhdudlaşdırmaq, rəqəmsal ekranlardan istifadəni azaldaraq təmiz havada yüngül gəzintilərə və nizamlı yuxu rejiminə üstünlük vermək tövsiyə olunur.

Risk qrupuna daxil olan xroniki xəstələr isə öz təzyiqlərini müntəzəm nəzarətdə saxlamalı və həkim tərəfindən təyin olunmuş dərman preparatlarının qəbulunu vaxtı-vaxtında icra etməlidirlər.