Türkiyənin Yalova vilayətinin Çınarcık rayonunda yaşayan 76 yaşlı Nimet Gürkanın öd kisəsindən keçirilən əməliyyat zamanı 3 mindən çox daş çıxarılıb.

Aztibb.az "HaberTürk"ə istinadən yazır ki, Esenköy qəsəbəsində yaşayan Nimet Gürkan təxminən bir il ərzində mədə, döş qəfəsi və bel nahiyəsində ağrılardan əziyyət çəkib. Ağrıları daha da şiddətləndiyi üçün o, Çınarcık Dövlət Xəstəxanasına müraciət edib.

Əlavə müayinələr üçün Yalova Təhsil və Araşdırma Xəstəxanasına göndərilən xəstə analizlərdən sonra ümumi cərrah Dr. Mehmet Ali Yücesoy tərəfindən təcili əməliyyata götürülüb.

Uğurla keçən əməliyyat zamanı həkimlər Nimet Gürkanın öd kisəsi ilə birlikdə illər ərzində yığılan və süni intellekt vasitəsilə sayılan 3 mindən çox daşı çıxarıblar.

Dr. Mehmet Ali Yücesoy bildirib: “Öd kisəsini açdıqdan sonra minlərlə daş görmək bizi də təəccübləndirdi. Xəstəmizi sağlam vəziyyətdə evə buraxırıq”.

Mütəxəssislər bildirirlər ki, öd kisəsi daşları uzun müddət simptomsuz qala bilər. Lakin qarının sağ yuxarı hissəsində ağrı, ürəkbulanma, həzm pozğunluğu və ya kürəyə yayılan ağrılar müşahidə olunduqda həkim müayinəsinə müraciət etmək vacibdir.