Nevroloq İrina Zavalko xəbərdarlıq edir ki, zəngli saatın səsi ilə qəfil oyanmaq orqanizm üçün ciddi stress yaradır və bəzi hallarda insult riskini artıra bilər.

Aztibb.az "Life" portalına istinadən yazır ki, mütəxəssisin sözlərinə görə, insan hələ yuxunun təsirindən tam çıxmamış vəziyyətdə zəngli saatın səsi ilə qəfil oyanaraq dərhal işə hazırlaşmağa başlayırsa, bu, orqanizm üçün güclü stres amilinə çevrilir.

“30–40 yaşlarında nisbətən sağlam insanlarda bu, adətən ağır nəticələrə səbəb olmur. Lakin hətta gənclərdə belə başgicəllənmə yarana bilər ki, bu da yıxılma və travma riskini artırır”, – deyə həkim qeyd edib.

Nevroloqun sözlərinə görə, damarlarında dəyişikliklər olan və ürək-damar xəstəliklərinə meyilli şəxslərdə vəziyyət daha təhlükəli ola bilər. Belə insanlarda infarkt və ya insult riski yüksəlir.

Bundan əlavə, qəfil ayağa qalxmaq ortostatik hipotenziyaya – yəni uzanıqlı vəziyyətdən dik vəziyyətə sürətli keçid zamanı arterial təzyiqin kəskin enməsinə səbəb ola bilər. Həkimin sözlərinə görə, bu hal xüsusilə yuxudan oyandıqdan dərhal sonra daha çox müşahidə olunur.

Qəfil oyanma gün ərzində ümumi əhval-ruhiyyəyə və iş qabiliyyətinə də mənfi təsir göstərir. İnsan “yuxu inertliyi” adlanan vəziyyətlə qarşılaşa bilər. Bu zaman düşünmə sürəti zəifləyir, hərəkət koordinasiyası pozulur, unutqanlıq artır və səhər saatlarında məhsuldarlıq aşağı düşür.

Mənfi təsirlərin qarşısını almaq üçün mütəxəssis yataqdan tədricən qalxmağı tövsiyə edir. Əvvəlcə oturmaq, qısa oynaq hərəkətləri etmək, qolları və ayaqları hərəkət etdirmək, daha sonra isə ehtiyatla ayağa qalxmaq məsləhətdir.