Səhiyyə Nazirliyinin dəstəyi, Avropa Baş Ağrısı Federasiyası (EHF), School of Headache Essentials (SHE) və Azərbaycan Miqren Mütəxəssisləri İctimai Birliyinin birgə təşkilatçılığı ilə Bakı və Gəncədə nevroloqlar üçün “Birincili baş ağrılarının miqren fokusu ilə diaqnozu və müalicəsi” mövzusunda EHF-SHE görüşü keçirilib.

 

Bu məlumat Aztibb.az-a Səhiyyə Nazirliyindən verilib.

 

Bildirilib ki, tədbirdə beynəlxalq ekspertlər – professor Mesud Aşina (Danimarka), professor Antoinette Maassen Van Den Brink (Niderland), dosent Mark Braşinski (Estoniya) və doktor Sərxan Əmirquliyev (Azərbaycan) baş ağrılarının müasir diaqnostika və müalicə yanaşmalarına dair məruzələrlə çıxış ediblər.

 

Poliklinika həkimlərinin peşəkar bilik və bacarıqlarının artırılmasına yönəlmiş görüşdə 100-dən artıq nevroloq iştirak edib. Praktiki əhəmiyyəti ilə seçilən tədbir iştirakçıların böyük marağına səbəb olub və geniş müzakirələrlə müşayiət olunub.