Alimlər bitkilərdə baş verən fotosintez prosesindən ilhamlanaraq insan gözü üçün yeni texnologiya hazırlayıblar. İspanaqdan əldə edilən bu innovativ üsulun quru göz xəstəliyinin müalicəsində əhəmiyyətli təsir göstərə biləcəyi bildirilir.

Aztibb.az "Live Science" nəşrinə istinadən yazır ki, tədqiqatçılar bitkilərin fotosintez mexanizmini insan göz hüceyrələrinə uyğunlaşdıran yeni bir araşdırma həyata keçiriblər.

İspanaq yarpaqlarından çıxarılan xüsusi fotosintetik hissəciklər gözə damcı vasitəsilə tətbiq edilib və müsbət nəticələr əldə olunub.

Sinqapur Milli Universiteti tərəfindən aparılan tədqiqatda ispanaq yarpaqları nanohissəciklərə çevrilərək quru göz sindromuna bənzər vəziyyəti olan siçanlara tətbiq edilib.

Hüceyrələri qoruyan molekul istehsal edilib

Alimlər müəyyən ediblər ki, bu hissəciklər işığa məruz qaldıqda hüceyrələri qoruyan NADPH adlı molekulun istehsalını aktivləşdirir.

NADPH quru göz xəstəliyində iltihab və hüceyrə zədələnməsinə səbəb ola bilən reaktiv oksigen növlərinə qarşı əsas müdafiə mexanizmlərindən biri hesab olunur.

Bu səbəbdən yeni metodun göz yanması, batma və ağrı kimi simptomları azaltma potensialına malik olduğu düşünülür.

Tədqiqatın müəlliflərindən Xinq Kuoran bildirib ki, bu nəticə bitkilərdəki fotosintez mexanizminin ilk dəfə məməli toxumalarına tətbiq olunaraq bioloji faydalı molekullar istehsal etdiyini göstərir.

Metod hələ ilkin mərhələdədir

“LEAF” adlı fotosintetik hissəciklərin göz hüceyrələrində yalnız bir neçə saat fəaliyyət göstərdiyi, daha sonra təsirinin azaldığı müəyyən edilib. Buna görə də alimlər hazırda bu texnologiyanın daha uzunmüddətli təsir göstərməsi üçün çalışmalar aparırlar.

Tədqiqatçılar hesab edirlər ki, bu texnologiya yalnız quru göz xəstəliyi ilə məhdudlaşmaya bilər və gələcəkdə digər göz və toxuma xəstəliklərinin müalicəsində də istifadə oluna bilər.