"NUR" Sığınacaq Evindən ağır vəziyyətdə olan azyaşlı uşaq təcili olaraq Azərbaycan Respublikası Səhiyyə Nazirliyinin K.Y. Fərəcova adına Elmi-Tədqiqat Pediatriya İnstitutuna gətirilib.

Aztibb.az xəbər verir ki, Yenidoğulmuşların Patologiyası şöbəsinə yerləşdirilən azyaşlıya həkim-pediatr Dilşad Atakişiyevanın, şöbə müdirinin və institut rəhbərliyinin birbaşa nəzarəti altında dərhal zəruri tibbi yardım göstərilib.

20 günədək stasionar müalicə müddətində uşaq üçün kompleks müayinə və intensiv müalicə tədbirləri həyata keçirilib. İnstitutun tibbi heyətinin apardığı peşəkar və operativ müdaxilələr nəticəsində azyaşlının səhhəti tamamilə yaxşılaşıb.

Sağlamlığına qovuşan uşaq müalicəsi uğurla başa çatdıqdan sonra tibb bacısının müşayiəti altında yenidən "NUR" Sığınacaq Evinə təhvil verilib.