Azərbaycan Tibb Universitetində (ATU) “Çiyin-çiyinə tibb naminə” Universitetlərarası klinik-praktik Olimpiadada qalib olmuş komandalarla görüş keçirilib.

Universitetdən Aztibb.az-a verilən xəbərə görə, görüşdə qaliblərə rektor, professor Gəray Gəraybəylinin səmimi təbriklərini çatdıran ATU-nun tədris işləri üzrə prorektoru, professor Anar Ağayev göstərilən yüksək nəticələrin universitetin tələbə potensialı, eləcə də gələcək səhiyyə mütəxəssislərinin hazırlıq səviyyəsinin bariz göstəricisi kimi dəyərləndirib. 

Prorektor qeyd edib ki, tələbələrin nəzəri biliklərini praktik bacarıqlarla birləşdirə bilmələri müasir tibb təhsilinin əsas prioritetlərindən biridir və bu kimi olimpiadalar gənclərin klinik düşüncə tərzinin formalaşmasına, komanda şəklində işləmək bacarıqlarının inkişafı və peşəkar hazırlıq səviyyələrinin yüksəldilməsinə mühüm töhfə verir. 

İctimai səhiyyə fakültəsinin dekanı, dosent Qalina Qəniyeva da qalibləri təbrik edərək, onların nümayiş etdirdikləri yüksək hazırlıq səviyyəsini, peşəkar yanaşma və komanda ruhunu yüksək qiymətləndirib. 

Qeyd edək ki, ATU və İ.M. Seçenov adına Birinci Moskva Dövlət Tibb Universitetinin Bakı filialının birgə təşkilatçılığı ilə keçirilən “Çiyin-çiyinə tibb naminə” Universitetlərarası klinik-praktik Olimpiadanın əsas məqsədi tələbələrin klinik bilik və praktik bacarıqlarının inkişaf etdirilməsi, komanda işinin təşviqi və universitetlərarası əməkdaşlığın gücləndirilməsidir. 

Görüşün sonunda olimpiadada I, II və III yerləri tutmuş komandalara kubok və diplomlar təqdim olunub və gələcək fəaliyyətlərində yeni nailiyyətlər arzulanıb.