1984-cü il təvəllüdlü pasiyent kəskin daşlı xolesistit diaqnozu ilə Tədris Cərrahiyyə Klinikasına müraciət edib. Aparılan müayinələrdən sonra xəstəyə laparoskopik xolesistektomiya əməliyyatı icra olunub.

Aztibb.az-a Klinikadan bildirilib ki, ATU-nun III Cərrahi xəstəliklər kafedrasının assistenti, Tədris Cərrahiyyə Klinikasının ümumi cərrahı Telman Əmirovun rəhbərliyi ilə həyata keçirilən əməliyyat zamanı iltihablaşmış və böyümüş öd kisəsi tam şəkildə xaric edilib. Cərrahi müdaxilə uğurla başa çatıb.

Telman Əmirov bildirib ki, daşlı xolesistit zamanı xəstələrdə adətən sağ qabırğaaltı nahiyədə başlayan və sağ kürək və ya sağ çiyin nahiyəsinə yayılan kəskin tutmaşəkilli ağrılar müşahidə olunur. Xəstəliyin diaqnostikasında əsasən ultrasəs müayinəsi (USM) mühüm rol oynayır və əksər hallarda diaqnozun təsdiqlənməsi üçün kifayət edir.

Ümumi öd yollarında daş və ya digər maneələrdən şübhələnildikdə, həmçinin öd yollarında genişlənmə aşkarlandıqda əlavə olaraq MRCP və ya ERCP müayinələri aparıla bilər. Lakin öd yollarında genişlənmə və ya tıxanma əlamətləri olmadıqda sadə USM müayinəsi diaqnozun qoyulması üçün yetərli hesab olunur.