Bu gün dünya ictimaiyyəti münaqişələr və terrordan zərər çəkən uşaqların gününü qeyd edir.

Aztibb.az xəbər verir i, 4 iyun – Aqressiya Qurbanı Olan Uşaqların Beynəlxalq Xatirə Günü məhz bu ağrını dünyaya xatırlatmaq üçün təsis edilib. Bu gün yalnız həyatını itirən uşaqların deyil, həm də fiziki, psixoloji və mənəvi travmalarla böyüməyə məcbur qalan milyonlarla körpənin xatirəsinə ehtiram günüdür. BMT Baş Assambleyası 1982-ci ildə qəbul etdiyi qətnamə ilə bu günü beynəlxalq təqvimə daxil edib və dünya ictimaiyyətini uşaqların hüquqlarının müdafiəsinə çağırıb. Günün əsas məqsədi müharibə, zorakılıq və aqressiya nəticəsində zərər çəkən uşaqların yaşadığı ağrıların unudulmamasıdır. 

Tarix göstərir ki, hər bir silahlı münaqişə gələcək nəsillərin taleyində sağalmaz izlər buraxır. Müharibələr yalnız şəhərləri dağıtmır, həm də uşaqların arzularını, təhsil imkanlarını, təhlükəsizlik hissini məhv edir. Bu gün dünyanın müxtəlif bölgələrində minlərlə uşaq zorakılıq, məcburi köçkünlük, aclıq və psixoloji travmalarla üz-üzədir. Beynəlxalq təşkilatlar dəfələrlə bəyan ediblər ki, uşaqların qorunması bəşəriyyətin ən vacib vəzifələrindən biridir. 

Bütün dövlətlər uşaqların müdafiəsi üçün mühüm təminatlar verən 1925-ci il Cenevrə protokoluna və 1949-cu il Cenevrə konvensiyalarına,insan hüquqlarına hörmət edilməsinə aid digər beynəlxalq hüquq aktlarına müvafiq öhdəliklərini tam yerinə yetirməli, müharibə edən tərəflərin hərbi əməliyyatlar zamanı uşaqlara qarşı törədilən bütün repressiya və qəddarlıq, insanlıqdan kənar davranış formaları cinayətkar hərəkətlər sayılır.

Ermənistan Silahlı Qüvvələri tərəfindən İkinci Qarabağ, 44 günlük müharibə dövründə amansız və aqressiv davranışlar özünü daha qabarıq büruzə verdi. Bütün dünya münaqişə zonasından kənarda, Azərbaycanın Naftalan, Ağcabədi, Gəncə və Bərdə şəhər və rayonlarında mülki əhaliyə qarşı ermənilərin terror hücumlarının yaxından şahidi oldu. Bu terror hadisələri nəticəsində 12 uşağın həyatını itirməsi, 50 uşağın isə xəsarət alması işğalçı Ermənistan Silahlı Qüvvələrinin əsl simasını bir daha ortaya qoydu.