Rusiyada Tula Vilayət Onkoloji Dispanserinin həkimləri Yefremov şəhər sakini olan 49 yaşlı qadın üzərində mürəkkəb cərrahi əməliyyat həyata keçirərək 35 kiloqram ağırlığında nəhəng şişi çıxarıblar.

Aztibb.az xəbər verir ki, "Lenta.ru"nun məlumatına görə, qadın qarın nahiyəsinin sürətlə böyüməsinə baxmayaraq uzun müddət tibbi yardıma müraciət etməyib. Yalnız yaxınlarının təkidi ilə müayinədən keçməyə razılaşıb.

Pasiyent əvvəlcə rayon xəstəxanasında müayinə olunub, daha sonra təcili şəkildə onkoloji dispanserə göndərilib. Aparılan müayinələr nəticəsində ona gec mərhələdə yumurtalıq xərçəngi diaqnozu qoyulub.

Həkimlər iri ölçülü törəmənin çıxarılması üçün əməliyyat həyata keçiriblər. Cərrahi müdaxilə ağırlaşma olmadan başa çatıb və əməliyyatdan sonra xəstənin vəziyyəti sabitləşib.

Hazırda qadın müstəqil şəkildə hərəkət edə bilir və özünü əvvəlki dövrlə müqayisədə xeyli yaxşı hiss edir.

Mütəxəssislər bildirirlər ki, bu cür hallar orqanizmdə baş verən narahatedici dəyişikliklərin vaxtında qiymətləndirilməsinin vacibliyini bir daha göstərir. Xəstəlik erkən mərhələdə aşkar edildikdə müalicə imkanları daha geniş olur və ağır fəsadların qarşısını almaq mümkünləşir.

Qeyd: Qarın nahiyəsinin səbəbsiz böyüməsi, davamlı ağrılar, iştahsızlıq, tez yorulma və ya çəki dəyişiklikləri kimi əlamətlər müşahidə olunduqda gecikmədən həkimə müraciət etmək tövsiyə edilir. Erkən diaqnostika onkoloji xəstəliklərin uğurlu müalicəsində əsas amillərdən biridir.