Düzgün qamət və rahat mebellər onurğa sağlamlığını qorumaq üçün vacib olsa da, təkbaşına bel problemlərindən sığorta vermir. Bel ağrılarının qarşısını almağın əsas yolu müntəzəm fiziki aktivlikdir.

Aztibb.az xəbər verir ki, "Daily Mail" nəşrinə müsahibəsində bu barədə İspaniyanın Qranada şəhərində yerləşən San Sesilio Universitet Klinikasının travmatoloqu İnes Sançes bildirib.

Mütəxəssis qeyd edib ki, bir çox insan bel sağlamlığını qorumaq üçün düz oturmağın, hərəkətləri ehtiyatla etməyin və ortopedik kreslolardan istifadə etməyin kifayət etdiyini düşünür. Lakin təcrübə göstərir ki, bu tədbirlər xroniki bel ağrılarının qarşısını hər zaman ala bilmir.

Həkimin sözlərinə görə, onun pasiyentləri arasında qamət qaydalarına ciddi əməl edən, lakin buna baxmayaraq davamlı bel narahatlığından əziyyət çəkən insanlar az deyil. Bunun əsas səbəbi uzun müddət eyni vəziyyətdə qalmaq və ümumi hərəkət çatışmazlığıdır.

Travmatoloq izah edib ki, onurğa sütunu, fəqərəarası disklər, əzələlər və bağlar normal fəaliyyətlərini qorumaq üçün müntəzəm yüklənməyə ehtiyac duyurlar. Uzun müddət hərəkətsiz qalmaq qan dövranını zəiflədir, oynaqların hərəkətliliyini azaldır və onurğanı dəstəkləyən əzələ korsetinin zəifləməsinə səbəb olur.

İnes Sançesin fikrincə, bel problemlərinin profilaktikasında ən təsirli üsul gün ərzində davamlı hərəkət etməkdir. Xüsusilə iş masasının arxasında uzun saatlar keçirən insanlara hər 30 dəqiqədən bir ayağa qalxmaq, qısa isinmə hərəkətləri və ya dartınma məşqləri etmək tövsiyə olunur.

Mütəxəssis əlavə edib ki, gündəlik gəzintilər və istənilən növ orta intensivlikli fiziki fəaliyyət də onurğa sağlamlığı üçün faydalıdır. Müntəzəm hərəkət dayaq-hərəkət aparatının normal fəaliyyətini dəstəkləyir və xroniki ağrıların yaranma riskini əhəmiyyətli dərəcədə azaldır.